Psalms 84
Yook 84
Yook ambo bi ye karub yeman.Gitit ye kiwaan wingki yeman. Korah ye karub dana meed yi yook. God yaningko kankooni ye yook.
1O Ana Nangmidan Yemoon YeYariman,eb dobirimbon kuu yeka mamaa manimanandeb kii!
2Ne mimyob buruwandoone ne bobne kombaraan,
Yariman ye kurikuri boyambib ye kuuk wirinimbon ye dowad.
Ne niindem aomiib ne idiib kuu
wad doreen ye God yaa kube wingkaan.
3On yiwonkib kuu amunbon ari wedmenu yu ambib yenbeen,
kwane on berekmad kangkon kuyaa yu ami ongmeen,
yu wini kanuun ye dowad.
Kukuu eb yaa dingkan aye nengke baeb kabdi yeman diambon kui,
o Ana Nangmidan Yemoon YeYariman, ne King, ne God.
4Kane kane eb ambiwoom doriib kuu amun kerundewen.
Yi kuu ewaningko kankoonembirimaib.Selah
5Kane kane yi aromkono eb yaambed kandimaib kuu amun kerundewen,
kane kane yi niindem aom Godiib yaa wenem ande inamen ongmiwen kui.
6Yi kuu kiwaan wedya wene inok wi ye kankubunen yaa nandiwen,
kumban kuyaa kuu kirubdem okbon ande meene kubimaib,
yi kuu am kubudoroon kumbed amun kerundoon yokad ande meenimaib kui.
7Yi yaa komo komo meneboon kuu God yaromkonomo awine yarebiwen kowe,
yi mimim korem kuu Saiyon aom God ye arinambo ari miniwen.
8O Ana Nangmidan Yemoon YeYariman God, ne kurikuri weng kee wengambere.
O Yekob ye God, ne yaa wengamberewe.Selah
9O God, nub dorondari karub yaa wedmene.
Ye ari oiyo bune kinewen ye karub yaa kubi dowaken keene.
10Eb kurikuri boyambib ye kuuk wirinimbon aom aronki mimo dobiri kuu miin amun yeman,
aronki tauseniib bunangka dobiri arebban.
Amun yeman ande meenaan ye deme embeng mimo kukei, ne God yambib ambongko aomnimbon yaa ooni,
kukuu arewa kamenabidan yi kombon aombed deme darewoob awini arebban.
11Amborom kuuYariman God kuu aron ye nambiri areb, ye kuu kombe areb,
Yariman kuu kubi dowakeniib aningko kankooniyiib bangkandimaan.
Komo komo amun kuu yeka kirim kere amuknindo,
kane kane kangdommo doriib kuyaa kwane bangkandimaan.
12O Ana Nangmidan Yemoon YeYariman,
eb yaambed angkumone doreenman kuu amun kerunewen kii!
Copyright information for
YON